Дубай аэропортига фавқулодда қўнишни амалга оширган самолётда жабрланганлар борлиги аниқланди

Emirates авиакомпаниясига тегишли Boeing 777 самолётининг Дубай аэропортида фавқулодда қўниб, ўт олиши билан боғлиқ воқеада ўнга яқин йўловчи жароҳат олди. Бу ҳақда, Gulf News’га асосланиб, «РБК» хабар бермоқда.

Яраланганлар Рашид шифохонасига ётқизилди. Уларнинг аксарияти куйишдан ёки тутун ютишдан зарар кўргани маълум; фақат бир йўловчи узоқ муддат даволанишига тўғри келади.

Тируванантапурам (Ҳиндистон) — Дубай йўналишидан кетаётан EK521 рейси 3 август куни Дубай аэропортига фавқулодда қўнишни амалга оширди. Шундан сўнг лайнерда ёнғин келиб чиқди. Бортда 300 киши, шу жумладан, 18 нафар экипаж аъзоси бор эди.