Ўзбекистон миллий терма жамоасининг ЖЧ—2018 3-саралаш босқичидаги илк рақиби Сурия терма жамоаси бўлади. 3-саралаш босқичига қадар 7 та гол уришга муваффақ бўлган жамоа етакчиси Умар Харбин ФИФА расмий сайтига интервью бериб, бўлажак рақиблар ҳақида фикр билдирди.
ЎФФ матбуот хизмати хабарига кўра, Харбин яна 4 та гол кирита олса, Сурия термасининг ЖЧ саралашлари тарихида 11 та гол уришга муваффақ бўлган Саид Боязидга етиб олади. Боязид 2002 йилги саралаш ўйинларида шунча гол урган футболчи ҳисобланади.
«Боязиднинг рекордини янгилаш кейинги босқич ўйинларида мен учун мотивация бўлиб хизмат қилади», — деди 22 ёшли футболчи. 2-босқичда Сингапур майдонида гол урган Харбин, ўша голини саралашдаги энг қадрлиси деб атаган. Чунки ўша гол сўнгги сонияларда киритилган бўлиб, Суриянинг навбатдаги босқичга йўл олишида катта рол ўйнаган.
«Биз жой олган гуруҳ иккинчисидан мураккаброқ. Чунки бунда ҳамманинг кучи тенг. Аммо имконсиз ишнинг ўзи йўқ. Иккинчи босқичдаги каби ўйнай олсак, мақсадимизга етишимиз мумкин», — дейди Умар Харбин.
Харбин Эрон миллий терма жамоасини гуруҳдаги энг кучлиси деб атади. — «Кореянинг ҳолати эса аввалгидан бироз пасайгандек. Ливандан учраган мағлубияти ҳам буни кўрсатиб турибди. Хитой сўнгги вақтларда анча ўсди, Қатарда бир қатор иқтидорли футболчилар бор. Мақсадимиз гуруҳни иккинчи, ҳеч бўлмаганда учинчи ўринда якунлаш».
Ўзбекистон ва Сурия терма жамоалари 1 сентябрь куни Тошкент шаҳрида тўқнаш келади. — «Аминманки, ўйин икки жамоа учун ҳам қийин бўлади. Нима қилиб бўлсада очко ишлашимиз керак», — деди Умар.
«Биз учун энг муҳими — сурияликлар юзига табассум улашиш. Умид қиламанки, бу мақсадда терма жамоанинг барча футболчилари бирлашади. Мамлакат бошига тушган мураккаб бир даврда ватандошларимиз қалбига оз бўлсада илиқлик олиб кирмоқчимиз. Бу бизни ўйинларга чоғлаётган, иштиёқ бераётган асосий мотивациядир. Биз доим мухлислар ҳақида ўйлаймиз ва умид қиламанки, биз Жаҳон чемпионати йўлланмасини қўлга киритамиз».
Изоҳ (0)