Тошкентда Бразилиянинг Рио-де-Жанейро шаҳрида жорий йилнинг август-сентябрь ойларида бўладиган XXXI ёзги Олимпия ва XV Паралимпия ўйинларида иштирок этадиган Ўзбекистон спорт делегациясини кузатиш маросими бўлиб ўтди. Бу ҳақда Ўзбекистон Миллий олимпия қўмитасининг ахборот хизмати маълум қилди.
Тўрт йилликнинг энг йирик спорт ўйинларига йўл оладиган Ўзбекистон спорт делегацияси аъзолари анъанага мувофиқ Мустақиллик ва эзгулик монументи, Амир Темур ҳамда Алишер Навоий ҳайкаллари пойига гул қўйди.
Тадбирда Ўзбекистон Республикаси Бош вазири Шавкат Мирзиёев иштирок этди. У XXXI ёзги Олимпия ва XV Паралимпия ўйинларида спортчиларга муваффақият тилади.
Тадбирда, шунингдек, Ўзбекистон Миллий олимпия қўмитаси раиси, сенатор М. Усманов чиқиш қилди. Сўзга чиққан спортчилар Олимпия ўйинларида ўзларининг маҳоратини намойиш этиб, юксак ғалабалар билан қайтишга ваъда берди. Бу ғалабалар мустақилликнинг 25 йиллик байрамига туҳфа бўлажаги таъкидланди.
Олимпия ўйинларида ўзбекистонлик спортчилар академик эшкак эшиш, бадиий гимнастика, байдарка ва каноэда эшкак эшиш, бокс, дзюдо, енгил атлетика, оғир атлетика, спорт гимнастикаси, стол тенниси, сузиш, таэквондо (WTF), теннис, трамплин, ўқ отиш, эркин ва юнон-рум кураши каби спорт турлари бўйича баҳслашади. Улар орасида Олимпия ўйинлари ва жаҳон чемпионатлари ғолиб ва совриндорлари бўлган тажрибали спортчилар билан бир қаторда ушбу мусобақада илк маротаба иштирок этадиган ёш спортчилар ҳам кўп.
Шунингдек, Рио–2016 Паралимпия ўйинларида Ўзбекистон 2012 йили Лондонда бўлиб ўтган Паралимпия ўйинларига нисбатан уч баробар кўп иштирокчилар билан қатнашади.
Ўзбекистон спорт делегациясини кузатиш маросимида, шунингдек, Ўзбекистон Республикаси Олий Мажлиси Сенатининг Раиси Н. Йўлдошев ва Қонунчилик палатаси Спикери Н. Исмоилов иштирок этди.
