Times: ХОҚ янги қайта текширувдан сўнг россиялик спортчиларнинг допинг намуналари ижобий чиққанини аниқлади

Халқаро олимпия қўмитаси (ХОҚ) янги қайта текширувдан сўнг россиялик спортчиларнинг 2008 ва 2012 йилги Олимпиада ўйинларида топширган допинг намуналари ижобий чиққанини аниқлади. Бу ҳақда, Times’га таяниб, «ТАСС» хабар бермоқда.

Айнан нечта россиялик спортчида допинг-проба ижобий чиққани ҳақида маълумот берилмаган.

22 июль, жума куни XОҚ 2008 ва 2012 йилги Олимпиада ўйинларида топширилган допинг-пробаларни қайта текширишнинг иккинчи тўлқини ҳақида маълум қилганди. Унга кўра, 45 нафар спортчининг намуналарида тақиқланган препаратлар аниқланган. 23 та ижобий натижа Олимпиада ўйинларининг совриндорларида чиққан.

Аввалроқ қайта текширувнинг биринчи тўлқинида Пекин–2008 ўйинларининг 454 та намунасидан 30 таси ижобий чиққан эди. Лондон–2012 ўйинларидаги қайта текширилган 265 та намунадан 23 таси ижобий натижа берган.

Россия олимпия қўмитаси раҳбари Александр Жуков 22 июль, жума куни ташкилот иккинчи қайта текришув натижасида россиялик спортчилардан аниқланган ижобий допинг-пробалар ҳақида ҳеч қандай маълумот олмаганини айтиб ўтди.