Хонанда Шаҳзода «Бекажон» газетасига берган интервьюсида янги ташкил этган компанияси, шунингдек, бунга турмуш ўртоғининг муносабати хусусида тўхталиб ўтди. Суҳбатни «Даракчи.uz» сайти келтирмоқда.

«‘Интер медиа’ компаниясини очиш дўстим Даврон Муқимов билан биргаликдаги ғоямиз эди. Мақсадимиз иқтидорли ёшларни қўллаб-қувватлаш, уларга кўмак бериш — продюсерлик фаолияти билан шуғулланишдир. Компания ташкил этганимиз билан мен ‘Тарона рекордс’дан кетмайман. Қадрдон жойим билан ижодий ҳамкорлигимиз давом этаверади. Концертларимни ташкил этиш ҳам ушбу компания зиммасида қолаверади. ‘Интер медиа’нинг эса ҳали олдинда амалга оширадиган вазифалари ва лойиҳалари бисёр», — деди хонанда.

«Турмуш ўртоғимга келадиган бўлсак, у киши мени оилада ҳам, ижодда ҳам ҳар тарафлама қўллаб-қувватлаб келган. Керакли маслаҳатларини аямаган. Умр йўлдошим ҳеч қачон менга қатъий талаблар қўймайди. Бирор ишни бажармоқчи бўлсам, ‘Уриниб кўр’ дейди. Агар муваффақиятга эришсам, бундан фақат хурсанд бўлади ва ишимга омад тилайди», — қўшимча қилди у.

Шунингдек, Шаҳзода фарзандлари ҳақида гапириб ўтди:

«Фарзандларим ҳақида гапирадиган бўлсам, катта ўғлим Солиҳ анча улғайиб қолди. Менга ҳар доим ‘Яна улғайишим керак. Ҳали оила қурмоқчи эмасман. Кечроқ уйланаман’ дейди. Чунки у йигит киши ҳар томонлама мустақил оёққа туриб олиши лозим, деб ҳисоблайди. Ўзига муносиб қиз топса, бир-бирини тушунадиган, муҳими, севишадиган бўлса, унинг танловига қаршилик билдирмайман. Чунки яшайдиган иккаласи, мен эмас. Бир-бирига ёқса, бахт тилайман. Солиҳнинг фикрларига қарши бормайман, чунки у катта йигит бўлиб қолди. У жуда ақлли йигит бўлган, уни уришмайман, кенжатойим эса ҳали жуда кичкина ва ширинтой. Умуман, болаларга қаттиқ гапириш, уришиш, жазолаш тарафдори эмасман».