Франция полициясининг аксилтеррор бошқармаси Ницца шаҳри расмийларига 14 июль куни теракт содир этилган жойда ўрнатилган ва ҳодисани ёзиб олган барча кузатув камераларининг видеоларини тезкорлик билан олиб, уларни йўқ қилишга буйруқ берди. Бу ҳақда Le Figaro газетаси шахсий манбасига таяниб маълум қилди, деб хабар бермоқда «ТАСС».
Le Figaro нашри скан қилинган буйруқнинг нусхасини газетага чоп этган. Унда қайд этилишича, Ницца шаҳри мэрияси кузатув камералари 14 июль, соат 22:30 дан, террорчи ўз ҳужумини бошлаган вақтдан 15 июль, 18:00 гача ёзиб олган видеоларни йўқ қилиши керак. Шунингдек, шаҳар расмийларига воқеа жойида олинган ва терговга алоқаси бўлмаган видеолавҳалар нусхаларини йўқ қилишга кўрсатма берилди.
Хабарда қайд этилишича, Ницца мэриясида Париждан келган хатдан сўнг ваҳима ва тушунмовчилик пайдо бўлди. «Биздан биринчи марта далилларни йўқ қилиш талаб қилинмоқда. Ницца шаҳри муниципалитети ва видео кузатув маркази бунинг натижасида таъқиб қилиниши мумкин. Бундан ташқари, ушбу тизим билан шуғулланадиган ходимлар бундай хатти-ҳаракатларни амалга ошириш учун ваколатга эга эмас», – деб маълум қилди терговга яқин бўлган манба.
Ницца шаҳри видео кузатув тизими 2010 йилда ташкил этилган бўлиб, Францияда биринчиси ва энг йириги ҳисобланади. Айни дамда шаҳар кўчаларини 24 соат давомида кузатиб борадиган 1 200 та камера мавжуд. Видео кузатув тизимини шаҳар полициясининг 70 ходими назорат қилади.
Изоҳ (0)