Ҳозирда Италияда яшаб, фаолият олиб бораётган Ўзбекистон терма жамоасининг собиқ футболчиси Илёс Зейтуллаев матбуотда ўзи ҳақида тарқалган хабарларга изоҳ берди. Аввалроқ Зейтуллаевнинг ёши беш йилга кичрайтирилгани, бу иш ошкор бўлгач, Италия уни визадан маҳрум қилгани, Ўзбекистон футбол федерацияси эса унга нисбатан жазо қўллагани ҳақида хабарлар тарқалган эди, деб эслатади «Stadion.uz».
«Менинг ёшим беш йилга эмас, икки йилга кичрайтирилган, буни тан оламан. Лекин бу борада менга нисбатан ҳеч қандай текширув олиб борилмади, ҳеч ким жазо чораларини қўлламади. ЎФФда ҳам жанжал, можаролар юз бермади», — деди у.
«Ёшни кичрайтириш муаммоси фақат Ўзбекистонга тааллуқли эмас, — сўзида давом этди собиқ футболчи, — бу бутун дунёда қилинадиган иш. Энг ёрқин мисол — Лусио. Аммо ёш футболчиларни бу ишга қўл урмасликларини, менинг хатоларимни такрорламасликларини маслаҳат берган бўлардим».
Илёс Зейтуллаев бугунги фаолиятига ҳам тўхталиб ўтди:
«Ҳозирда Ўзбекистон фуқаросиман, Италияда яшаш учун рухсатномам бор. Расман мураббийлик фаолияти билан шуғулланмоқдаман».
Зейтуллаев фаолиятининг асосий қисмини Италияда ўтказган. У «Ювентус», «Режина», «Верона», «Пескара», «Торино» клубларида ўйнаган. Ўзбекистон терма жамоаси таркибида ўнта ўйинда майдонга тушиб, иккита гол урган.
Изоҳ (0)