PoodleCorp хакерлик гуруҳи Pokemon Go ўйинини йўқ қилмоқчи эканлигини маълум қилди. Бу ҳақда Independent нашри маълумотига таяниб, «ТАСС» хабар бермоқда.
Газетада таъкидланишича, хакерлик ҳужуми 1 август куни бўлиб ўтиши мумкин. Айнан мазкур хакерлар ўйин серверларига ўтган шанба, 16 июль куни DDoS-ҳужум уюштирганлиги тахмин қилинмоқда. Ўшанда бу биринчи уриниш эканлиги маълум қилинган эди.
Pokemon Go ўйини атрофида юзага келган шов-шувлар Angry Birds ёки «Тетрис»нинг оммабоплиги билан таққосланмоқда. Ўйин чиқарилгандан кейинги бир ҳафта ичида у юклаб олиш бўйича хитга айланди ва Nintendo компаниясининг капитализациясини бир ярим мартадан кўпроққа оширди.
Ўйинни юклаб олишлар сони аллақачон 15 миллиондан ошди, ҳар кунги фойдаланувчилар сони эса 20 миллионга баҳоланмоқда.