Халқаро валюта жамғармаси 2017 йилда Венесуэлада 1600 фоизлик инфляция бўлишини айтди

Жорий йил якунларига кўра Венесуэлада истеъмол нархларининг ўсиши 480 фоизни ташкил этиши мумкин, кейинги йилда эса 1600 фоизга етади. Ушбу прогнозни Халқаро валюта жамғармаси берди, деб ёзмоқда «Интерфакс».

Венесуэла оғир иқтисодий инқирозни бошдан кечирмоқда. Мамлакат озиқ-овқат, дори-дармон ва бошқа товарлар импортига қаттиқ боғланиб қолди. Нефть нархининг тушиб кетиши оқибатида озиқ-овқат ва биринчи эҳтиёж моллари етишмовчилиги авж олди. Кўплаб майда савдо нуқталари ёпилиб кетди, дўконларда улкан навбатлар юзага келмоқда, талончилик ҳолатлари кўпаймоқда.

Бир муддат илгари Венесуэла армияси аҳолини озиқ-овқат ва дори-дармон билан таъминлаш мақсадида портларни ва озиқ-овқат корхоналарини назорат остига олди.

Мухолифат бу вазиятда президент Николас Мадуро ва ундан олдинги раҳбар Уго Чавесни айбламоқда. Мадуро, ўз навбатида, йирик бизнесменларни сиёсий мақсадларда иқтисодиётни бойкот қилишда айбламоқда.

Кўпгина экспертлар мамлакат яқинда Халқаро валюта жамғармасидан ёрдам сўрашини кутмоқда. Аммо жамғарма вакиллари Венесуэла ўн йил муқаддам, Чавес даврида узилган алоқаларни тиклашга шошилмаётганини эътироф этмоқда.