НАТО Украинага кенг қамровли ёрдам пакетини маъқуллади

НАТО Украинага кенг қамровли ёрдам пакетини маъқуллади, бу ҳақда альянс бош котиби Йенс Столтенберг Варшавадаги саммитда НАТО-Украина комиссияси мажлиси якунларига кўра маълум қилди, деб ёзади «Корреспондент.net».

«Режа кибермудофаа, фронт орқаси таъминоти, ярадор аскарлар реабилитацияси бўйича яратиб бўлинган траст фондларини ўз ичига олади. Келажакда, шунингдек, биз миналардан тозалаш ва қўлбола портловчи қурилмаларни йўқ қилиш бўйича лойиҳаларни амалга ошириш ниятидамиз», — деди бош котиб, аммо у ушбу ёрдам пакети ҳажмига аниқлик киритмади.

Столтенберг, шу билан бирга, Украинанинг НАТОга қўшилиш масаласи айни пайтда «кун тартибида турмаётгани»ни таъкидлади.