Видео: Уэльс аҳолиси мамлакат футболчиларини қаҳрамонлардек кутиб олди
Евро–2016 турнирининг ярим финалига қадар етиб кетган Уэльс терма жамоаси футболчилари ўз мамлакатида ҳақиқий қаҳрамонларга айланди. 100 минглаб уэльсликлар терма жамоанинг қитъа чемпионатидаги муваффақиятли иштирокидан сўнг уларни кутиб олиш учун пойтахт Кардифф кўчаларига чиқди, деб хабар бермоқда ABC News.
Уэльс терма жамоаси учун Евро–2016 омадли ўтди. Гуруҳ босқичида уэльсликлар Словакияни 2:1, Россияни 3:0 ҳисобида мағлубиятга учратиб, Англияга 1:2 ҳисобида енгилган эди. Крис Коулмен шогирдлари гуруҳдан биринчи ўрин билан ўз тарихида илк бор плей-офф босқичига чиқди.
Нимчорак финалда Уэльс термаси Ирландияни 1:0 ҳисобида енгган бўлса, чорак финалда Бельгия термаси устидан 3:1 ҳисобидаги сенсацион ғалабани қўлга киритди. Ярим финалда Гарет Бэйл ва унинг жамоадошлари Португалия термасига 0:2 ҳисобида енгилди.
