«Пахтакор» ҳужумчиси Игорь Сергеев «Бейжинг Гоан» билан ярим йиллик шартномага имзо чекди

«Пахтакор» ва Ўзбекистон миллий терма жамоаси ҳужумчиси Игорь Сергеев навбатдаги 6 ойни Хитой Супер Лигасида ўтказади. Бу ҳақда «Championat.asia» сайти хабар берди.

Ўзбекистон миллий терма жамоаси ҳимоячиси Егор Кримец тўп сураётган «Бейжинг Гоан» клуби Игорь Сергеевни ижара асосида ўз сафига қўшиб олди. Олдиндаги 6 ой давомида ҳужумчининг ҳаракатлари маъқул келса, шартнома узайтирилиши ҳам мумкин.

«Бейжинг Гоан» Туркия терма жамоаси Евро—2016 мусобақасидан чиқиб кетгач ҳужумчи Бурак Йилмаз билан ҳам шартнома имзолаганди. Бундан шу маълум бўладики, Ўзбекистон миллий терма жамоасининг асосий ҳужумчиси янги клубида бошланғич таркибга кириш учун Туркия миллий терма жамоасининг асосий ҳужумчиси билан рақобат ҳосил қилади. Йилмаз—Сергеев тандеми бир вақтда майдонга тушиши ҳам эҳтимолдан ҳоли эмас.

ЖЧ—2018 3-саралаш босқичида Ўзбекистон билан бир гуруҳдан жой олган Хитой Супер Лигасида терма жамоанинг яна бир ҳимоячиси Анзур Исмоилов ҳам тўп суради. Ўзбекистон Олий Лигасида эса хитойлик футболчи йўқ.

Игорь Сергеев ҳамда Егор Кримец жамоаси «Бейжинг Гоан» 16 та жамоа иштирок этадиган Хитой чемпионатининг 1-даврасидан сўнг 8-ўринни эгаллаб турибди.