Мадинадаги терактни асли покистонлик шахс содир этгани маълум бўлди

Мадина шаҳридаги Масжиди Набавия яқинида теракт содир этган худкуш 12 йил муқаддам Саудия Арабистонига кўчиб келган покистонлик киши бўлиб чиқди. Бу ҳақда «Интерфакс» хабар бермоқда.

Қироллик ички ишлар вазирлигининг маълум қилишича, худкушнинг шахси аниқланган бўлиб, у 34 ёшли Покистон фуқароси Абдулла Калзар Хон экан. Эркак хотини ва унинг ота-онаси билан Жиддада яшаб, ҳайдовчи бўлиб ишлаб келган экан, деб қўшимча қилади Associated Press.

Саудия Арабистонида 9 миллион чет эл фуқароси истиқомат қилади, улар орасида энг катта гуруҳни покистонликлар ташкил этади.

Эслатиб ўтамиз, хавфсизлик хизмати худкушни масжид ичкарисига киритмаганидан сўнг у портловчи ускунани муассаса автотураргоҳи яқинида ҳаракатга келтирди. Бунинг оқибатида хавфсизлик хизматининг тўрт ходими ҳалок бўлди.