Энг кучли смартфонлар рейтингида дастлабки беш ўринни Хитой компаниялари эгаллади

AnTuTu бенчмарки 2016 йил ўртасининг энг кучли смартфонларини аниқлади. Дастлабки беш ўринни Хитой компаниялари забт этиб, Apple ва Samsung’дан ўзиб кетди, деб хабар бермоқда «Hi-Tech.Mail.ru».

Рейтингда биринчи ўринни OnePlus 3 эгаллади. У бенчмаркда 140 288 балл тўплади, аммо реал ҳаётда у Samsung Galaxy S7 дан ортда қолади деган фикр бор.

Иккинчи ўринда — vivo Xplay 5 Elite; у биринчи ўрин соҳибидан 1582 баллга ёки 1,1 фоизга ортда қолди. Учинчи поғонани LeEco Max2, тўртинчисини — Lenovo ZUK Z2 Pro банд этди, бешликка Xiaomi Mi5 якун ясади

Samsung Galaxy S7 edge 134 599 балл кўрсаткич билан (етакчидан 5689 балл ёки 4 фоизга камроқ) олтинчи ўринга кўтарила олди, холос. Ундан кейин iPhone 6s келади. Apple’нинг яна бир смартфони — iPhone SE тўққизинчи ўринни эгаллади, бунда у Хитойнинг ZTE AXON 7 смартфонидан бироз ортда қолди; ўнликка Lenovo ZUK Z2 ҳам кирди.

Шу тариқа, энг кучли смартфонлар ўнлигидаги еттита ўринни Хитой маҳсулоти, иккита ўринни АҚШ гаджетлари, битта ўринни Жанубий Корея телефони эгаллади.