Нидерландияда дунёдаги биринчи Буюмлар Интернети тармоғи ишга туширилди

Нидерландияда Буюмлар Интернети (Internet of Things, IoT) учун ихтисослаштирилган дунёдаги биринчи тармоқ ишга туширилди, у бутун мамлакат ҳудудини қамраб олади, деб ёзади 3DNews.

IoT-тармоқ Нидерландияда KPN телекоммуникация компанияси томонидан ишга туширилди. Лойиҳа доирасида юзлаб мобил алоқа станцияларига катта радиусли қамровни таъминловчи LoRa (Long Range) ускуналари ва махсус антенналар ўрнатилди.

Ушбу инфратузилма миллионлаб турли-туман қурилмаларга хизмат кўрсата олиши тахмин қилинмоқда. Хусусан, ҳозирданоқ KPN компанияси 1,5 миллионта «буюм»ни янги тармоққа улаш ҳақида сўров қабул қилди.

«Буюмлар Интернети» концепция бўлиб, унда моддий объектлар Тармоққа уланган ҳамда иш самараси ва қулайлигини ошириш мақсадида ахборот алмашиш учун бошқа қурилмалар билан идентификация қилина олади.