Туркия ички ишлар вазири Эфкан Ала Истанбул шаҳридаги Отатурк номли халқаро аэропортда содир этилган теракт қурбонлари сони 43 кишига етганини маълум қилди. Бу ҳақда, Hurriyet нашрига асосланиб, «Ведомости» хабар бермоқда.
Илгарироқ 41 киши ҳалок бўлгани билдирилганди. 29 июнь, чоршанба кечаси Украина фуқароси бўлган аёл Истанбулдаги шифохоналардан бирида ҳаётдан кўз юмди.
Ҳалок бўлганларнинг 19 нафари чет эл фуқароси эканлиги айтилмоқда.
Вазир, шунингдек, террорчилардан бирининг шахси аниқлангани ҳамда унинг ИШИДга алоқадорлиги борасида маълумотлар қўлга киритилганини қайд қилиб ўтди.
Эслатиб ўтамиз, Туркиянинг Истанбул шаҳридаги Отатурк номли халқаро аэропортда содир этилган теракт оқибатида ҳаётдан кўз юмганлар орасида Ўзбекистон фуқароси борлиги ҳақида хабар берилганди. Жароҳатланганлар сони 147 кишини ташкил қилмоқда. Ўзбекистон Президенти Ислом Каримов терактлар муносабати билан Туркия президенти Ражаб Тоййиб Эрдўғонга ҳамдардлик билдирди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)