Аргентина президенти ва Диего Марадона Мессини терма жамоада қолишга чақирди

Аргентина президенти Маурисио Макри ҳамда собиқ футболчи Диего Марадона футбол бўйича мамлакат термаси ҳужумчиси Лионель Мессини жамоа сафида қолишга чақирди. Бу ҳақда Ultimas Noticias хабар бермоқда.

• Месси Аргентина терма жамоасидаги фаолиятини якунлаганини эълон қилди

Аргентина президенти футболчи билан телефон орқали алоқага чиқиб, унинг мамлакат термасидаги ўйинларидан фахрланишини айтди ва уни ёғилиб келаётган танқидларга эътибор бермасликка чақирди. Шунингдек, Маурисио Макри Twitter’даги саҳифасида футболчини қуйидаги сўзлар билан қўллаб-қувватлади. «Умид қиламанки, дунёдаги энг яхшиларни кўриш қувончи узоқ йиллар давом этади», – деб ёзди Аргентина президенти.

• Месси ортидан Маскерано ва Агуэро ҳам Аргентина термасидаги фаолиятини тугатди

Ўз навбатида Аргентина футболи афсонаси Диего Марадона Мессини Россияда бўлиб ўтадиган ЖЧ–2018 турнирида иштирок этишга чақирди. «Жамоа олдинга бора оладиган футболчиларга таяниши керак, ундан кетадиганларга эмас», – деди Марадона.

Лионель Месси 27 июнь куни Чилига қарши (0:0, пенальтилар бўйича: 2:4) Америка Кубоги–2016 финалида учралган мағлубиятдан сўнг терма жамоадаги иштирокини якунлаши ҳақида эълон қилди. Шундан сўнг, 29 ёшли футболчи мамлакат терма жамоасини тарк этиш сабабларини тушунтириб берди.

• Сўровнома: Лионель Мессининг Аргентина терма жамоасидаги фаолиятини якунлаганига сизнинг муносабатингиз қандай?

«Мен тўртта финалда ўйнадим, лекин тақдир эмас экан. Мен бор кучим билан Аргентинани чемпион қилишга уриндим. Лекин бу амалга ошмади. Уддалай олмадим. Ўйлашимча, бу ҳаммага яхши, менга ҳам, буни истаётганларгаям. Қарор қабул қилинди. Кўп уриндим, аммо ўхшамади», — деди аргентиналик футболчи.

• Мессининг кўз ёшлари, Чили термасининг қувончи. Америка Кубоги–2016 финалидан фоторепортаж

Лионель Месси Аргентина терма жамоаси сафида 2005 йилдан буён тўп суриб келаётганди. 113 ўйинда ҳужумчи 55 та гол киритишга муваффақ бўлган.