Туркия президенти Ражаб Тоййиб Эрдўғон россиялик ҳамкасби Владимир Путиндан уриб туширилган Су-24 самолёти учувчисининг ўлими учун узр сўради. Бу ҳақда Дмитрий Песков баёнот берди, деб ёзмоқда TJournal.
«Россия Федерацияси президенти Владимир Путинга Туркия президенти Эрдўғондан келган мурожаатда Туркия етакчиси Россия ҳарбий самолёти ҳалокати билан боғлиқ вазиятни изига туширишга қизиқиш билдирди», — деди Песков.
Кремль вакилининг таъкидлашича, «Туркия раҳбари ҳалок бўлган россиялик учувчининг оиласига самимий ҳамдардлик ва афсусларини билдирди».
«У ‘Кечирасизлар’ деди ҳамда Россия билан дўстлик муносабатларини тиклаш учун қўлидан келган ишни қилишга тайёрлигини айтди», — қўшимча қилди Песков.
Шунингдек, мурожаатда Эрдўғон россиялик ҳарбийнинг ҳалокатига алоқадор Туркия фуқаросига нисбатан тергов ишлари давом этаётганлигини уқтиргани айтилмоқда.
«Туркия томони марҳумнинг танасини суриялик мухолифатчилардан олиб, Туркияга етказиш билан боғлиқ таҳдидларни ўзига олди ва бу йўлда катта ишларни амалга оширди», — деди Песков.
2015 йилнинг 24 ноябрь куни Туркиянинг F-16 қирувчиси Россиянинг Су-24 самолётини уриб туширди. Расмий Анқара Россия ҳарбий самолёти Туркия ҳаво чегарасини бузганлигини эътироф этмоқда, Кремль эса буни рад этиб, ҳаво кемаси Сурия ҳудудидан ўтмаганини уқтирмоқда.
Самолёт учувчиси Олег Пешков катапульта ёрдамида кемани тарк этди, аммо ҳаводалигида қуролли шахслар томонидан отиб ташланди. Унга ўлимидан сўнг Россия Қаҳрамони унвони берилди.
Бу воқеа Туркия ва Россия ўртасидаги муносабатларнинг кескин ёмонлашувига сабаб бўлди.
Изоҳ (0)