КХДР БМТ Хавфсизлик кенгаши томонидан мамлакатда баллистик ракеталар учирилишини қоралаган баёнотни тўлиқ рад этади. Бу ҳақда КХДР Ташқи ишлар вазирлиги вакили «Нодон синмун» газетасида чоп этилган баёнотида маълум қилди, дея хабар бермоқда «ТАСС».
Унинг таъкидлашича, Корея Меҳнат партиясининг АҚШ ва бошқа душман кучлари томонидан таҳдид юзага келаётган шароитда мамлакат хавфсизлигини таъминлаш мақсадида ядровий кучларни мустаҳкамлаш ва иқтисодиётни параллель ривожлантириш тизимига мувофиқ жорий ҳафтада «Хвасон-10» ракеталари учирилган.
Дипломат Корея ярим оролидаги кескинликнинг ортиши учун жавобгарликни Вашингтонга юклаб, БМТ Хавфсизлик кенгашининг баёнотини иккиюзламачи сиёсатнинг холисликдан маҳрум маҳсули деб атади. У, токи АҚШ КХДРга санкциялар ва ядро таҳдиди ёрдамида босим ўтказишни давом эттирар экан, КХДР бу каби чораларни қабул қилишда давом этиши ҳақида огоҳлантирди.
Изоҳ (0)