Ўзбекистон Президенти Ислом Каримов 24 июнь куни Кўксаройда Афғонистон президенти Ашраф Ғани билан учрашув ўтказди. Бу ҳақда ЎзА хабар берди.
Ислом Каримов учрашувда Ашраф Ғанининг Ўзбекистонга илк ташрифи икки мамлакат ҳамкорлигини янги босқичга кўтаришга хизмат қилишини таъкидлади.
Учрашувда ўзаро савдо ҳажмини янада ошириш ва номенклатурасини кенгайтириш масалалари муҳокама қилинди. Томонларни қизиқтирган минтақавий ва халқаро аҳамиятга молик муаммолар юзасидан фикр алмашилди.
Афғонистон президенти самимий учрашув учун Ўзбекистон Президентига миннатдорлик билдириб, Афғонистон Ўзбекистон билан ҳамкорликни янада ривожлантиришдан манфаатдор эканини таъкидлади.
Маълумот учун, Ўзбекистон Афғонистонда тинчлик ўрнатиш, унинг иқтисодиётини тиклаш тарафдори бўлиб келмоқда. Ўзбекистон Афғонистонга электр энергияси, мева-сабзавотлар, нефть маҳсулотлари, минерал ўғитлар экспорт қилмоқда. 2016 йилнинг дастлабки тўрт ойида ўзаро товар айирбошлаш ҳажми 14 фоиз ошди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)