Германия парламенти арманилар геноциди ҳақида резолюция қабул қилди

Бундестаг депутатлари 1915 йилда Усмонли салтанатида арманиларнинг депортация қилинишини геноцид деб тан олиш юзасидан резолюция қабул қилди. Резолюцияга қарши фақат бир депутат овоз берди, бир нафари овоз беришдан тийилди, деб хабар беради Meduza.

«1915–1916 йилларда Усмонли салтанатида арманилар ва бошқа христиан озчиликларнинг геноциди хотирасига» деб аталган ҳужжат канцлер Ангела Меркель ва ташқи ишлар вазири Франк-Вальтер Штайнмайер йўқлигида қабул қилинди.

Маълумот учун, 1915 йилда Усмонли салтанатида, турли баҳоларга кўра, 600 мингдан 1,5 миллионгача армани ҳалок бўлган. Туркия юз минглаб инсонлар ҳалок бўлганини тан олади, аммо бунинг «геноцид» атамаси билан таърифланишига қарши чиқади. Ўз навбатида, турк тарихчилари арманиларнинг қуролли гуруҳлари ўн минглаб мусулмонларни қирғин қилганини таъкидлаб келади.