АҚШ президенти Барак Обама Хотира куни муносабати билан Вашингтонда жойлашган Арлингтон миллий қабристонидаги Номаълум аскар қабрига гулчамбар қўйди. Арлингтонда 300 минг америкалик ҳарбий хизматчи дафн этилган, деб эслатади «ТАСС».
Маросим давомида ҳарбий оркестр давлат мадҳиясини ижро этди. Сўнг давлат раҳбари бир ерда тўпланган фахрийлар, собиқ ҳарбий хизматчилар ва уларнинг оила аъзолари қаршисида чиқиш қилди.
«Бу ерда дафн этилган америкаликлар ва уларнинг оила аъзолари бизларнинг энг аслларимиздир. Бир вақтлар биз учун борини берганлар бугун эвазига бир нарса сўрамоқда — уларни эсдан чиқармаслигимизни», — деди Обама ўз чиқишида.
Президент урушлар қурбонларига бўлган ҳурматни тирик қолганларга давлат томонидан кўрсатилаётган эътибордан билиш мумкинлигини таъкидлади.
«Биз улар ўзлари муносиб бўлган нарсани олишларига кафолат беришимиз лозим, хоҳ соғлиқни сақлаш бўлсин, хоҳ муносиб иш ўринлари», — қўшимча қилди у.
Изоҳ (0)