ИШИД террорчилик гуруҳи жангарилари Ироқнинг катта қисми ҳалигача экстремистлар назорати остида бўлган Ал-Фаллужа шаҳрида юз нафар ёш йигитни қўлга олди ва куч билан сақлаб турибди. Бу ҳақда «Ас-Сумария» телеканалига таяниб, «ТАСС» хабар берди.
Шаҳар оқсоқолларидан бири шайх Мажид ал-Жарисий маълум қилишича, ИШИД экстремистлари 30 май куни эрталабдан шаҳар маркази ва ғарбидаги иккита бозорни қуршаб олган ва юзга яқин ёш йигитларни ҳибсга олган. Қўлга олинганларнинг барчасини радикаллар «соқол ўстирмаганликда» айблаган.
Ал-Фаллужа оқсоқоли таъкидлашича, жангарилар маҳбусларни бир нечта машинада номаълум томонга олиб кетган.
Ал-фаллужалик юзлаб йигитларнинг кейинги тақдири номаълум бўлиб қолмоқда.
Эслатиб ўтамиз, аввалроқ Ироқ қуролли кучлари ИШИД томонидан 2014 йилда босиб олинган Ал-Фаллужа шаҳрига киргани хабар берилган эди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)