Исроил вазирлар маҳкамаси раиси Биньямин Нетаньяху Россия президенти Владимир Путинга Сурия қўшинлари 1982 йилда Жанубий Ливаннинг Султон-Яакуб қишлоғи яқинидаги жангда ўлжа сифатида қўлга киритган танкни қайтаришга рози бўлгани учун миннатдорлик билдирди, деб ёзади «Ведомости» Нетаньяхунинг матбуот хизматига таяниб.
Magach танки Исроил армияси томонидан биринчи Ливан уруши чоғида Сурия Қуролли кучлари бўлинмалари билан жанглар давомида қўлдан бой берилган эди. Унинг уч кишидан иборат экипажи тақдири ҳалигача номаълум бўлиб қолмоқда. Охир-оқибат, танкни собиқ иттифоққа топширишди, ва айни пайтда машина Подмосковье музейида экспонат сифатида сақланади.
«Мен Россия президенти Владимир Путинга Султон-Яакуб яқинидаги жангларда қатнашган танкни Исроилга қайтариш ҳақидаги сўровимга ижобий жавоб бергани учун миннатдорман», — деди Нетаньяху. Танкни ватанига қайтариш масаласи Исроил бош вазирининг апрелда Москвага ташрифи чоғида кўтарилган эди.
Изоҳ (0)