Ироқ қўшинлари ва сунний кўнгиллилари Бағдоддан 50 километр узоқликдаги Ал-Фаллужа шаҳри яқинида 110 нафар жангарини йўқ қилди. Бу ҳақда ҳукумат кучларининг Анбар вилоятидаги қўмондонлиги томонидан тарқатилган баёнотда билдирилган, дея хабар беради «ТАСС».
«Ироқ жангчилари душманнинг 39 ўт очиш нуқтаси, 18 ҳарбий-транспорт воситаси ва икки бульдозерини сафдан чиқарди. Портловчи қурилмалар тайёрлаш бўйича учта устахона йўқ қилинди, 536 фугас зарарсизлантирилди ва 20 та уй минадан тозаланди. Ҳарбийлар ва кўнгиллилар хавфсиз йўлак орқали 507 оилани шаҳардан олиб чиқишга муваффақ бўлди», — дейилади мазкур баёнотда.
Ал-Фаллужадаги ҳукумат кучлари қўмондони генерал Абдулваҳҳоб ас-Саидийнинг таъкидлашича, қўшинлар шаҳар атрофидаги ҳудуднинг 80 фоизи устидан назорат ўрнатиб, марказий туманларни озод этиш бўйича операцияга тайёргарлик кўрмоқда. Бунда кўмак бериш учун Бағдоддан террорчиларга қарши кураш махсус кучларининг 5 минг нафар жангчиси етиб келган.
Экспертлар Ал-Фаллужа штурми 30 май, душанба куни бошланишини кутмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)