Польша жанубида яшин уриши оқибатида бир нафар сайёҳ ҳалок бўлди, уч нафари яраланди

Польша жанубида яшин уриши оқибатида бир киши ҳалок бўлди, яна уч киши жароҳат олди. Бу ҳақда, маҳаллий нашр маълумотига таяниб, «ТАСС» хабар берди.

Момақалдироқ бошланган пайтда Ғарбий Бескид чўққисидан пастга тушаётган 40 ёшли сайёҳ табиий офат қурбонига айланди. Воқеа гувоҳлари қутқарувчиларни чақирди, бироқ улар эркакнинг ҳаётини сақлаб қола олмади.

Иккинчи ҳодиса Пенинда, Соколица чўққиси яқинида юз берди. У ерда уч кишини яшин урди. Улардан ҳеч қайси ҳалок бўлмади, бироқ жабрланганлардан бири жиддий куйиш жароҳатини олди.

Польшада охирги кунларда қайд этилган иссиқ ҳаво кўплаб машҳур тоғ сўқмоқларида сайёҳларнинг пайдо бўлишига сабаб бўлди. Момақалдироқ улар бошпанадан узоқда бўлганида, кутилмаган пайтда юз берди.