Эронлик зиёратчилар Саудия Арабистони томонидан яратилаётган тўсиқлар туфайли жорий йилда Маккага — Ҳаж сафарига бора олмайди. Бу ҳақда, IRNA агентлигига таяниб, «Ведомости» хабар бермоқда.

«Биз бугунги кунга қадар Саудия расмийларидан жавоб кутдик. Ўтказилган музокараларнинг икки раундида улар томонидан яратилган тўсиқларни инобатга олсак, жорий йилда эронликлар зиёратга бора олмайди», — деди Эрон маданият вазири Али Жаннатий.

У Эрон Ҳаж ташкилоти жорий йилги сафарнинг бекор қилинганини 30 май, душанба куни эълон қилишини қўшимча қилиб ўтди.

Эслатиб ўтамиз, 2016 йилнинг 2 январида Саудия Арабистонида шиалар етакчиси Нимр ан-Нимр террорчиликда айбланган элликка яқин бошқа шахслар билан биргаликда қатл қилинганидан сўнг унинг Эрон билан муносабатларига совуқлик тушди. Теҳронда намойишчилар Саудия элчихонасига бостириб кирди. 3 январь куни Саудия Арабистони Эрон билан дипломатик алоқаларни узди.