АҚШнинг Виргиния штатида дизайнерлик сумкаларини харид қилиб, уларнинг қалбаки нусхаларини қайта сотиш усулини ишлаб чиққан аёл қамоққа олинди. Бу ҳақда «Интерфакс» хабар бермоқда.
Бир неча йил мобайнида Прэпича Сматсорабуд Gucci, Burberry, Fendi ва бошқа таниқли брендларнинг сумкаларини йирик дўконлар сайтларидан онлайн сотиб олган, уларнинг нархи донаси учун 2000 доллардан ошиқ бўлган. Бироқ орадан бироз ўтиб, аёл дўконга шахсан ўзи келиб, маҳсулотни қайтариб берган. Фақат аслини эмас, Хитойда ишлаб чиқарилган қалбаки нусхасини.
Сматсорабуд шу тариқа 12 штатни айланиб чиққан. Усул шунчалик яхши ўйлаб топилгандики, ўз вақтида аёл бутун дунёдаги онлайн-дўконларнинг энг ҳурматли мижози эди.
Аёл дўконда қалбаки сумкалар учун пул олиб, асл нусхаларни Instagram ёки eBay орқали сотувга қўйган. Шу тариқа у бир дўконлар тармоғининг ўзидан 1 миллион доллардан зиёд маблағ ишлаб топишга муваффақ бўлган. Бунда ҳали ҳақиқий сумкаларни онлайн сотишдан олинган «даромад» ҳисобга олинмаган.
Ҳибсга олиш чоғида Таиландда туғилиб-ўсган аёлнинг уйидан 572 дона сумка топилган ва уларнинг аксарияти қалбаки бўлган. Фирибгарлиги учун унга 20 йилгача қамоқ жазоси берилиши мумкин.
Изоҳ (0)