Марказий Осиё минтақасининг биринчи рақамли шахматчиси, 17-жаҳон чемпиони, 1998 йилги Осиё чемпиони Рустам Қосимжонов 26 майдан Тошкентдаги «Ўзбекистон» меҳмонхонасида бўлиб ўтаётган шахмат бўйича Осиё чемпионатидаги иштирокини ғалаба билан бошлади. Бу ҳақда «Оламспорт» хабар бермоқда.
Қитъанинг энг нуфузли Asian Continental Chess Championships 2016 турнири ўз тарихида 15-маротаба ташкил этиляпти.
26 май куни бўлиб ўтган илк турда Қосимжонов қора доналарда ҳаракат қилди. Унинг рақиби БАА вакили Омар Ноаман бўлди. Қора доналарда ҳаракат қилганига қарамай, Рустам Қосимжонов рақибини таслим этди.
Осиё чемпионатининг биринчи рақамли иштирокчиси — вьетнамлик Ле Куанг Лем ҳам мусобақадаги иштирокини ғалаба билан бошлади. У биринчи турда ўзбекистонлик Акмал Файзуллаевни мағлубиятга учратди.
Эркаклар ўртасидаги баҳсларда 91 нафар иштирокчи бош мукофот учун баҳсларга киришди. Хотин-қизлар мусобақасида эса 35 иштирокчи Осиё чемпионлиги учун курашяпти.