Эверестда дом-дараксиз йўқолган ҳиндистонлик альпинистнинг жасади топилди

Бир ҳафтача муқаддам Эверест ёнбағрида бедарак йўқолган ҳиндистонлик альпинистнинг жасади топилди. Шу тариқа, охирги ҳафта мобайнида Эверестда ҳалок бўлган альпинистлар сони тўрт кишига етди, деб хабар бермоқда «РИА Новости» «Непал» альпинистлар лагери бошқарувчи директори Ванчу Шерпага асосланиб.

Ҳалок бўлган альпинист дунёдаги энг баланд чўққини забт этишга отланган тўрт кишилик гуруҳ таркибида эди. 21 май, шанба куни гуруҳнинг барча аъзолари бедарак йўқолди. Эртаси куни икки киши топилди, лекин қутқарувчилар уларни эвакуация қилаётган чоғда гуруҳ аъзоси Субхаш Пал оламдан ўтди.

Гуруҳнинг яна бир аъзоси — 58 ёшли Пареш Чандра Натхнинг танаси саккиз минг метр баландликдан топилди. Қутқарувчилар ҳозирча ундан юқорини ўргана олмади — гуруҳнинг сўнгги аъзоси Гаутам Гхошнинг танаси ўша ҳудудда қолиб кетган деб ҳисобланмоқда.