«Вест Ҳэм» мухлислари «Манчестер Юнайтед» клуби автобусига ҳужум уюштирди (фото + видео)
Англия Премьер-лигасининг «Вест Ҳэм» ҳамда «Манчестер Юнайтед» клублари ўртасидаги 35-турнинг кечиктирилган учрашуви белгиланган вақтдан 45 дақиқа кейинроқ бошланди. «Чемпионат»нинг Telegraph нашрига асосланиб хабар беришича, бунга «Вест Ҳэм» фанатларининг «МЮ» футболчилари жой олган автобусга қилган ҳужуми сабаб бўлган.
Беллашув 10 май куни Тошкент вақти билан 23:45 да старт олиши керак эди. «Вест Ҳэм» мухлислари манчестерлик футболчилар жой олган автобусга ҳужум уюштиргач, «МЮ» беллашувни бироз кечроқ бошлашни сўраб, мурожаат қилган ва бу сўров қаноатлантирилган.
«Бу ёқимсиз ҳолат бўлди», — деб фикр билдирди «Юнайтед» сардори Уэйн Руни. — «Мураббийнинг кайфияти жойида эмасди, бироқ биз бўлажак ўйинга ўзимизни тайёрлашимиз керак эди. Ишончим комилки, сиз воқеага алоқадор фотосуратларни аллақачон кўриб чиққансиз. Бу мавзуни узоқ муҳокама қилмоқчимасман. Беллашув «Вест Ҳэм» учун катта аҳамиятга эга эди. Ишонаманки, клуб мутасаддилари ҳам фанатларнинг бу ишидан ҳафа бўлади», — деб Рунининг сўзларидан иқтибос келтирди «Isport».
Ўйиндан кейин «Вест Ҳэм» раҳбарияти ҳам мазкур воқеа юзасидан изоҳ бериб ўтди. «Российская Газета» клуб хўжайини Дэвид Салливандан қуйидагича изоҳ келтирди: — «Бахтга қарши, бундай воқеа стадионимиздаги сўнгги ўйин арафасида рўй берди. Мен фанатларимизнинг бу қилиғидан чуқур афсусдаман».
«Вест Ҳэм» фанатларининг бу иши ҳақида «Манчестер Юнайтед» клуби бош мураббийи Луи Ван Гал босиқлик билан жавоб қайтарди: — «Нима ҳам дейишим мумкин? Ҳаммасини ўзингиз кўрдингиз. Одамлар ўз ҳиссиётларига эркинлик беришди. Биз Лондонда иккинчи бор ўйин вақтини чўзишга мажбур бўлдик», — деб голландиялик мутахассиснинг сўзларидан иқтибос келтирган «Sports.ru».
Қайд этиш керак, Чемпионлар Лигаси йўлланмаси учун кураш олиб бораётган жамоалар иштирокидаги ўйинда «Манчестер Юнайтед» футболчилари 2:3 ҳисобида имкониятни бой берди. Учрашувдан олдинги тўполон «МЮ» футболчиларига таъсир кўрсатдими деган саволга бош мураббий Луи Ван Гал қуйидагича жавоб берди: — «Биз профессионаллармиз. Футболда бундай ҳолатлар учраб туришини ва унга тайёр туриш кераклигини биламиз. Ўйиннинг 70-дақиқасига қадар ҳисобда олдинда бора туриб, якунда 2 та гол ўтказиб юбориш, ҳеч бир мураббий учун қониқарли ҳолат эмас. Натижамиздан ҳафсалам пир бўлди».
«Газета.ru» хабарига кўра, фанатлар ҳужуми вақтида «Юнайтед» футболчилари автобус ўриндиқлари орасидаги тор йўлакдан жой олган ҳамда нималар бўлаётганини видеога туширишга ҳаракат қилган. Қайд этилишича, фанатлар шиша идиш ва турли буюмларни футболчилар жой олган автобус томон улоқтирган. Ярим ҳимоячи Жесси Лингард ижтимоий тармоқлардан бирига бу воқеа акс этган видеолардан бирини жойлаштирди. Унда жамоа футболчилари ўзини қандай тутганини кўриш мумкин.
Маълумот учун, «Манчестер Юнайтед»га қарши учрашув «Вест Ҳэм» уй ўйинларини ўтказадиган «Аптон Парк — Болейн Граунд»даги сўнггиси эди. «ТАСС» нашрига кўра, «Вест Ҳэм» келаси мавсумдан бошлаб Лондондаги Олимпия стадионида тўп суради ва клуб бу аренани 99 йилга ижарага олган. Унга кўра, жамоа стадион учун йилига 2,5 миллион фунт тўлаб туради.
Хабарда келтирилишича, Олимпия стадиони ўз бағрига 60 минг футбол мухлисини сиғдира олади. «Вест Ҳэм» 2016/17 йилги мавсум учун 50 минг абонементни сотувга чиқариши билан, уларнинг барчаси сотиб бўлинган.
