Москва вилоятида 5 нафар байкер отиб ўлдирилди

8 май, якшанба куни тонгда Россиянинг Москва вилоятида «Сайга» карабинидан беш нафар байкер отиб ўлдирилди. Бу ҳақда Тергов қўмитасининг минтақа бўйича бошқармаси маълум қилди, деб хабар беради «ТАСС».

«Мазкур ҳолат юзасидан тергов идоралари икки ва ундан ортиқ кишининг ўлдирилиши бўйича жиноий иш очди. Ҳодиса жойида тезкор тергов гуруҳи ишламоқда», — деб маълум қилди бошқарма вакиллари.

Терговчиларга кўра, 8 май соат 6:00 атрофида Егорьевск раёнидаги Челнохово қишлоғида, пиво заводининг ташландиқ биноси яқинида мотоциклчилар гуруҳи ва маҳаллий фуқаро ўртасида можаро келиб чиққан. Можаро давомида фуқаро «Сайга» карабинидан ўқ узган ва бунинг оқибатида беш нафар байкер ҳодиса жойида ҳалок бўлган. Содир этилган жиноятдан сўнг гумонланувчи яширинган.

Ҳуқуқ-тартибот идоралари гумонланувчи, 27 ёшли кимсанинг шахси аниқланганини билдирмоқда. Вилоятда «Сирена» махсус тадбири эълон қилинди.