Хитойда дунёдаги энг узун ҳашарот аниқланди

Хитой жануби-ғарбидаги Гуанси-Чжуан мухтор тумани тоғларида беқиёс узунликка эга ноёб ҳашарот тури аниқланди. Бу ҳақда «ТАСС» хабар бермоқда.

Аниқланган янги турдаги бешиктебратарнинг ўлчови оёқларини чўзиб турган ҳолатда 62,4 сантиметрни ташкил этади.

Илгариги рекордсмен Малайзия чангалзорларида 2008 йилда топилган Phobaeticus chani бешиктебратари эди. Унинг хитойлик “қариндоши”ни энтомолог Чжао Ли кашф этди. У Лючжоу шаҳри атрофида, 1,2 минг метр баландликда ҳашаротлар қидириш билан машғуллигида дафъатан улкан ҳашаротни кўриб қолди.

Янги тур Чжаонинг шарафига Phryganistria chinensis Zhao деб номланди. Намуна Чэнду шаҳридаги Хитой ноёб ҳашаротлари музейига етказилди. Ҳашарот шу пайтга қадар олтита тухум қўйишга улгурди.