Хитойда интернетни тартибга келтирувчи Киберҳудуд масалалари бўйича бошқарма 2016 йилнинг бошидан буён номақбул контент тарқатаётган 1 046 та сайт ва 8 008 та микроблогни ёпди. Бу ҳақда «РИА Новости» хабар беради.
Бошқарманинг маълум қилишича, веб-сайт ва блоглар порнографик материаллар ва Хитой миллий хавфсизлигига таҳдид қилувчи маълумотларни тарқатганлиги учун ёпилган. Бундан ташқари, яна 85 та сайт контент билан боғлиқ огоҳлантириш олган.
Март ойининг бошида ХХР ҳукумати 2015 йил давомида номақбул контент, шу жумладан, порнографик материаллар тарқатган 28 мингта сайтни ёпганлиги ҳақида маълум қилинган эди. Бундан ташқари, ҳукумат қоидаларни бузган 15 миллионта ноқонуний материални ўчириб ташлаган.