27 апрелга ўтар кечаси «Манчестер Сити» клуби Европа Чемпионлар Лигаси ярим финал дастлабки ўйинида «Реал»га қарши баҳс олиб борди. «Этиҳад» стадионида бўлиб ўтган мазкур беллашувда 0:0 ҳисоби қайд этилди, деб хабар беради «Чемпионат».

Ушбу учрашув «Манчестер Сити» ҳужумчиси Серхио Агуэронинг «Реал»га қарши 13-ўйини бўлди. Аргентиналик футболчи «Қироллик клуби»га қарши майдонга тушган ўйинларда унинг жамоаси бирор марта ҳам ғалаба қозонмаган. Агуэро иштирок этган ўйинларда унинг жамоаси 5 та дуранг қайд этиб, 8 марта мағлубиятга учраган.

27 ёшли футболчи фаолияти давомида «Реал» дарвозасини 4 марта ишғол қилган. У энг кўп ўйинни «Барселона» ва «Ливерпуль» клубларига қарши (14 мартадан) ўтказган.

Маълумот ўрнида, Серхио Агуэро 2006–2011 йиллар давомида Мадриднинг «Атлетико» клуби шарафини ҳимоя қилган. 2011 йил ёзидан бошлаб «Манчестер Сити»да тўп суриб келяпти.