Хитой раҳбарияти GAC Fiat Crysler автомобилсоз компаниясига тормоз тизимидаги нуқсон боис 2 990 машинани чақириб олиб, таъмирдан чиқариш борасида кўрсатма берди. Бу ҳақда, ХХР сифат назорати, текширув ва карантин бўйича давлат бошқармаси баёнотига асосланиб, «ТАСС» ёзмоқда.
Назорат органидаги маълумотларга кўра, 2012 йил мартидан 2014 йил апрелига қадар ишлаб чиқарилган машиналарнинг аксилблоклаш тизими бошқаруви бўлмасида нуқсон мавжуд бўлиб, шу сабаб унга намлик кириши ва тормознинг ишлашига халал бериши мумкин.
Регулятор автомобилсоздан тегишли модулни бепул алмаштириб беришни талаб қилди. Қарор 25 апрелдан кучга кирди.
GAC Fiat Crysler 2009 йилда ташкил топган бўлиб, Хитойнинг Guangzhou Automobile Group (GAC) ҳамда Fiat Chrysler Automobiles Италия-АҚШ холдингига тегишли қўшма корхона ҳисобланади. Унинг штаб-квартираси мамлакат марказидаги Хунань провинцияси маъмурий маркази — Чанша шаҳрида жойлашган. Айни пайтда Жанубий Хитойдаги Гуандун провинцияси маъмурий маркази Гуанчжоуда иккинчи завод қурилмоқда.
Изоҳ (0)