22 апрель, жума куни Дамашқ яқинида қулаб тушган Сурия қирувчи самолётининг учувчиси ИШИД террорчилик гуруҳи жангарилари қўлига тушди, дея хабар бермоқда «Интерфакс» араб ОАВларига таяниб.
Баъзи маълумотларга кўра, учувчи катапульта қилиб, самолёт қулаган жой яқинига қўнгач, асирга олинган.
Сурия Қуролли кучларидаги манбасига таяниб, «Интерфакс» ёзишича, Дамашқ яқинида қулаган МиГ-23 қирувчиси Сурия ҳарбий-ҳаво кучларига тегишли бўлган.
«Самолёт эндигина таъмирдан чиқиб, режали парвозни амалга ошираётган эди. Ердан зарба берилмаган. У техник носозлик туфайли қулаган. Учувчи катапульта қилган», — деди манба. Дастлабки маълумотларга кўра, авиаҳалокатга двигателнинг ёниб кетиши сабаб бўлган.
Нашр эслатишича, 22 апрель куни Ғарб ОАВлари ҳарбий самолёт ИШИД назорати остидаги ҳудуд устидан учиб ўтгач, Дамашқ аэропортидан жануби-ғарбда ҳалокатга учраганини маълум қилган эди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)