Япониянинг жануби-ғарбидаги Кумамото префектурасида (Кюсю ороли) ўтган ҳафта давомида бир ва ундан юқори магнитудали камида 767 та ер силкиниши қайд этилди. Бу ҳақда, Япония метеорология агентлиги маълумотига таяниб, «ТАСС» хабар беради.
«Ушбу ҳудуддаги сейсмик фаоллик ҳамон давом этмоқда. Маҳаллий аҳоли ҳушёрликни сақлаб, бинолар қулаши мумкин бўлган хавфли ҳудудларни тарк этиши лозим. Шу билан бир пайтда кучли жала ёғиши оқибатида кўчкилар содир бўлиши хавфи мавжуд», — деб таъкидлади метеорология агентлиги вакили.
Кумамото ҳукумати маълумотига кўра, кучли ёғингарчилик туфайли ҳозирга қадар 260 мингдан ортиқ кишига эвакуация тавсия этилган.
Кумамото ва унга қўшни Оита префектураларида юз берган кучли зилзилалар оқибатида ўн мингга яқин уй ва бошқа бинолар вайрон бўлган. Юз мингдан ортиқ одам ҳамон эвакуация пунктларида эканлиги маълум қилинган.
16 апрелдан буён давом этаётган зилзилалар оқибатида 48 киши ҳалок бўлган, 11 киши эса ер силкинишларига тўғридан-тўғри боғлиқ бўлмаган сабабларга кўра вафот этган.
Изоҳ (0)