Жанубий Кореянинг АКТни ривожлантириш соҳасидаги илғор тажрибаси билан танишиш, шунингдек, ўзаро алоқаларни янада мустаҳкамлаш мақсадида Ўзбекистон Республикаси Ахборот технологиялари ва коммуникацияларини ривожлантириш вазирлигининг кўмаги билан Тошкент шаҳридаги Инҳа университетида 2016 йилнинг 18 апрель куни АКТни ривожлантириш масалалари бўйича Ўзбекистон—Корея илмий-амалий форуми бўлиб ўтди. Бу ҳақда Тошкент шаҳридаги Инҳа университети матбуот хизмати хабар берди.
Форумни ташкиллаштиришда LG CNS, Samsung ва KT компаниялари яқиндан ёрдам берди.
Мазкур Форумда иштирок этиш учун Корея Республикасининг технологик ривожланиши жараёнида бевосита иштирок этган АКТ соҳасининг нуфузли экспертлари, олим ва етакчи тадбиркорларидан иборат делегация аъзолари ташриф буюрди.
АКТни ривожлантириш масалалари бўйича Ўзбекистон—Корея илмий-амалий форуми иккита сессияга бўлинган эди. Эрталаб ўтган биринчи сессияда маҳаллий IT-бизнес вакиллари иштирок этди. Тадбир давомида томонлар ишбилармон доиралар ҳамда олий ўқув юртлари ўртасида юқори малакали IT-мутахассисларни тайёрлаш борасидаги ҳамкорлик масалалари муҳокама этилди.
Куннинг иккинчи ярмида ўтган иккинчи сессия давлат ва хўжалик бошқаруви органлари вакиллари учун ташкил этилган эди. Мазкур сессия қатнашчилари АКТ тармоғини ривожлантиришда давлат сиёсати, АКТнинг миллий иқтисодиёт учун муҳимлиги, венчур фондларни ташкил этиш каби масалаларни кўриб чиқди.
Бундан ташқари, форум иштирокчилари Корея Республикасида АКТнинг ривожланиш босқичлари билан танишиб, IT бозоридаги етакчи компанияларнинг технологик ва бизнес йўналишларини муҳокама қилди.
Форум доирасида Тошкент шаҳридаги Инҳа университетида Маслаҳат Кенгашини ташкил этиш бўйича ўзаро англашув Меморандуми имзоланди. Мазкур ҳужжат Тошкент шаҳридаги Инҳа университети ҳамда Ўзбекистон Республикаси ва Корея Республикасидаги бизнес вакиллари томонидан имзоланди.
Маслаҳат Кенгаши университетга барча соҳаларда, жумладан, университет томонидан замонавий бозор талабларига мос келадиган мутахассисларни тайёрлаш, изланишлар олиб бориш, молиявий ва техник лойиҳаларга кўмаклашувда, инвестициявий лойиҳаларда маслаҳат ва тавсиялар беради.
Маслаҳат Кенгаши аъзолари университетга таълим хизматлари сифатини оширишга ҳамда Ўзбекистонда таълим муҳитини жаҳон стандартлари даражасида шакллантиришга кўмак беради.
Изоҳ (0)