Ўзбекистонлик теннисчилар Ҳумоюн Султонов ва Темур Исмоилов Бухоро шаҳрида давом этаётган, мукофот жамғармаси 25 минг долларга тенг Bukhara International теннис турнирининг ярим финалига чиқди, деб хабар беради «Sports.uz».
17 ёшли Султонов чорак финалда россиялик Евгений Элистаровга қарши кортга чиқиб, 7:6, 6:4 ҳисобида зафар қучди. 21 ёшли Темур Исмоилов эса бошқа бир россиялик теннисчи – Михаил Ледовскихни 6:1, 6:4 ҳисобида мағлубиятга учратди.
Эслатиб ўтамиз, дастлабки даврада Султонов болгариялик Васко Младеновни 4:6, 6:1, 7:6, иккинчи даврада грузиялик Александр Метревелини 3:6, 6:1, 6:4 ҳисобида таслим қилганди. Темур Исмоилов илк даврада ўзбекистонлик Павел Цойни 6:2, 6:2, иккинчи даврада сербиялик Илия Вучични 6:2, 6:1 ҳисобида мағлубиятга учратган эди.
Қайд этиш жоиз, мусобақа ярим финалида Ҳумоюн Султонов ва Темур Исмоилов ўзаро баҳс олиб боради.
Шунингдек, ўзбекистонлик Шаробиддин Абзалов билан тандем ҳосил қилган Ҳумоюн Султонов жуфтликлар баҳси ярим финалига қадар етиб келганди. Финал йўлланмаси учун кечган беллашувда Султонов/Абзалов жуфтлиги россиялик Евгений Элистаров ва Виталий Козюков дуэтига 2:6, 2:6 ҳисобида мағлуб бўлди.