Тошкентда 1 майдан чиқиндиларни олиб чиқиш хизматлари учун тарифлар оширилади

Жорий йилнинг 1 май кунидан эътиборан «Махсустранс» давлат ишлаб чиқариш бошқармаси Тошкент аҳолисига ва корхоналарга санитар тозалаш хизматларини кўрсатиш бўйича тарифларни оширади. Бу ҳақда «Махсустранс» шаҳар фойдаланиш бўлими «Дарё»га хабар берди.

Янги нарх-наво белгиланган декларация 7 апрель куни тасдиқланди. «Махсустранс» томонидан тақдим этилган ҳужжатда кўрсатилишича, 1 майдан бошлаб қуйидаги тарифлар амалга киради:

аҳолига қаттиқ маиший чиқиндиларни йўқ қилиш хизматини кўрсатиш — киши бошига ойига 3 000 сўм (эски тариф — 2 800 сўм);

қаттиқ маиший чиқиндиларни йўқ қилиш хизматини кўрсатиш нархи ҳам бюджетдаги, ҳам хўжалик ҳисобидаги корхона ва ташкилотлар учун бирдай оширилди — бир метр кубга 35 991 сўм (эски тариф — 33 591,4 сўм).

Ахлатни олиб чиқиб кетиш хизматини кўрсатиш ҳар икки турдаги корхона ва ташкилотлар учун ўзгаришсиз қолди — бир тоннага 13 449,4 сўм.

Ниҳоят, қаттиқ маиший чиқиндиларни Тошкент шаҳрининг Ҳамза, Яккасарой ва Юнусобод туманларидаги чиқинди юклаш станцияларидан НД-310 машиналарида «Оҳангарон» ахлатхонасига олиб бориб ташлаш нархи бир тоннага 10 010,5 сўм деб белгиланди (эски тариф — 9 343, 1 сўм).

Эслатиб ўтамиз, охирги марта маиший чиқиндиларни олиб чиқиш нархлари ўтган йилнинг 1 июнида оширилган эди.