Футбол бўйича Осиё Чемпионлар Лигаси гуруҳ босқичининг 4-турида Қаршининг «Насаф» клуби ўз майдонида Қатарнинг «Ал-Жаиш» жамоасини мағлуб эта олмади. «Championat.asia» ўйиндан кейин «Насаф» бош мураббийи Рўзиқул Бердиевнинг матбуот анжуманидаги фикрларини тақдим этди.
«Ўз ўйинимизни кўрсата олдик, бироқ кутилган натижа қўлга киритилмади. Тезкор гол киритиб, рақиб режасини буза олмадик. Эътирозим ҳужум чизиғи вакилларига бўлди. Бобур Абдухолиқовни бошланғич таркибга киритмай адашдим, дея олмайман. Умуман, ҳужумдаги муаммолар ҳақида бир неча йилдан буён сўз юритилади. Юқори савиядаги ҳужумчи сотиб олиш учун молиявий имкониятимиз йўқ. Келгусида бу масалани раҳбарият олдига қўяман», — дейди Рўзиқул Бердиев.
Учрашув давомида «Насаф» футболчилари тўпни жуда кўп йўқотиб қўйганига ҳам бош мураббий ўз эътиборини қаратди: — «Ўйин давомида оддий вазиятларда тўпни кўп йўқотдик. Бу ҳаяжон билан боғлиқ. Тўп билан муомала қилишда энг яхши футболчимиз Баҳром Абдураҳимов ҳам кўп хато қилди. Бугун у энг ёмон ўйинини ўтказди. «Обод»га қарши учрашувда олган кичик жароҳати бунга сабаб бўлса керак».«Гуруҳ босқичида 2-ўрин учун кураш давом этади. Жамоамиз гуруҳда қолиб кетса, бундан уялмаймиз. Биз шарманда бўладиган ўйин кўрсатмадик», — дея фикрини якунлади «Насаф» клуби бош мураббийи.