Мексика наркокартели АҚШга ўтиш учун қазиган 366 метрли ер ости йўли аниқланди
АҚШ ҳуқуқ-тартибот органлари мамлакатни қўшни Мексика билан боғлайдиган навбатдаги ер ости йўлини аниқлади. Associated Press агентлигига таяниб, «ТАСС»нинг хабар беришича, Мексика наркокартели ушбу махфий йўлдан АҚШга гиёҳванд моддалар етказишда фойдаланган.
АҚШ ҳуқуқ-тартибот органлари ходимлари қўлга туширилган бир тоннадан ортиқ миқдордаги марихуананинг келиб чиқишини текшириш асносида махфий йўлга дуч келди. Маълум бўлишича, 366 метрли туннель Мексиканинг Қуйи Калифорния штатидаги Мехикали шаҳрида жойлашган ресторандан бошланиб, АҚШнинг Калифорния штатида жойлашган Калексико шаҳарчасидаги янги қурилган уйга қадар борган.
Мексикалик жиноятчилар 2015 йил апрелида 40 минг киши истиқомат қиладиган Калексикода 240 минг долларга кўчмас мулк харид қилган ва ундан махфий йўлнинг охирги нуқтаси сифатида фойдаланган. Мазкур туннелдан дастлабки ноқонуний етказма 28 февраль куни амалга оширилган — у орқали АҚШга 600 килограмм марихуана олиб кирилган, аммо мол Лос-Анжелес яқинида қўлга туширилган.
Уй эгаси ҳибсга олиниб, гиёҳванд моддалар савдосида айбланмоқда.
Калексикодаги туннель охирги ўн йил ичида топилган Мексика билан АҚШни боғлайдиган ўн иккинчи махфий йўлдир.
Таъкидланишича, бу ҳудудда гиёҳванд моддалар савдосини Мексиканинг «Синалоа» картели назорат қилади. Жиноий тузилма раҳбари — «Пакана» лақабли Хоакин Гусман 2015 йилнинг июлида Мексика қамоқхонасидан узунлиги 1,5 километр бўлган ер ости йўли орқали қочиб кетган, аммо бир неча ойдан сўнг яна қўлга олинган эди.
