Брюссель метросидаги терактни икки киши содир этгани билдирилди

Брюссель метросидаги терактни икки киши содир этган бўлиши мумкин, деб хабар бермоқда Meduza RTBF телеканалига таянган ҳолда. Илгари метрополитендаги портлашларни бир нафар террорчи амалга оширгани тахмин қилинаётган эди.

Метродаги кузатув камералари қайдларига иккинчи гумондор шахс ҳам тушиб қолгани аниқланди. Портлашдан бир муддат олдин у террорчи Холид Бакравий билан катта сумкани олиб кетаётгани ёзувларда акс этган.

Гумондорлар рўйхатига қўшилган янги шахс худкуш бўлгани ёки терактни амалга ошириб, воқеа жойидан қочиб кетгани борасида ҳозирча аниқ маълумот йўқ.