Руслан Чагаевнинг рақиби Лукас Браунда допинг аниқланди
Профессионал бокснинг супероғир вазн тоифасида Жаҳон бокс ассоциацияси (WBA) чемпиони Лукас Браун допинг текширувидан ўтганида, унинг қон намунасида тақиқланган кленбутерол моддаси борлиги аниқланди. Бу ҳақда «Оламспорт» хабар бермоқда.
Австралиялик боксчи ўзбекистонлик Руслан Чагаевга қарши ўтказган жангидан беш кун аввал ва жанг якунланганидан сўнг допинг учун таҳлил топширганди. Энди Браун чемпионлик камаридан маҳрум қилиниши мумкин. Руслан Чагаев эса янги чемпионлик жангида иштирок этиш имкониятига эга бўлади.
Маълумот учун, кленбутерол моддаси Халқаро антидопинг агентлиги (WADA) томонидан тақиқланган моддалар қаторига киритилган.
Эслатиб ўтамиз, Руслан Чагаев ва Лукас Браун ўртасидаги чемпионлик жанги 6 мартга ўтар кечаси, Грозний шаҳрида ўтказилганди. Унда ўзбекистонлик боксчи рақибига 10-раундда техник нокаут билан мағлуб бўлганди.
