ОАВ Париждаги терактлар ташкилотчисининг янги ҳужумлар ташкил этиш бўйича режалари ҳақида маълум қилди

Бельгияда Париждаги терактларнинг ташкилотчиси сифатида гумонланиб, ҳибсга олинган Салоҳ Абдислом терговчиларга Брюсселдан янги ҳужумларни ташкиллаштиришни режа қилганлигини тан олди. Бу ҳақда Associated Press агентлиги маълумотига таяниб, «Интерфакс» хабар беради.

Бельгия ташқи ишлар вазири Дидье Рейндерс у Брюсселдан туриб яна ниманидир бошлашга тайёр бўлганлиги ва бу ҳақиқат бўлиши мумкинлигини маълум қилган.

Бельгия ТИВ раҳбарининг сўзларига қараганда, Бельгия ҳукумати Абдисломнинг сўзларига жиддий аҳамият қаратган, чунки Париждаги терактлардан сўнг дастлабки терговлар давомида кўп миқдордаги қуроллар, жумладан, оғир қурол-аслаҳалар топилган. Бундан ташқари, Брюсселда Абдусалом билан алоқадор кишилар гуруҳи аниқланган.