Аляска ҳаво йўллари самолёти йўловчисининг iPhone’и парвоз чоғида ёниб кетди

Гавайи оролларига парвоз чоғида Alaska Airlines авиакомпанияси йўловчисининг қўлида iPhone 6 смартфони ёниб кетди, дея хабар бермоқда «Интерфакс».

Аёлнинг айтишича, смартфонидан аланга чиқа бошлаган вақтда у фильм кўраётган бўлган. Авиакомпаниядагилар бундай ҳодиса 17 март куни Вашингтон штатидаги Беллингхем шаҳридан Гавайи пойтахти Гонолулуга тунги парвоз чоғида юз берганини тасдиқлади.

Смартфон ёниб кетганини кўриб, аёл уни ерга ташлаб юборган, у ён ўриндиқнинг тагига тушган. Шунда аланга янада авж олган, бошқа йўловчилар ўз жойларидан сапчиб тура бошлаган. Экипаж аъзолари тезда оловни ўчирган. Ҳодиса натижасида ҳеч ким жабр кўрмаган, самолётга ҳам зиён етмаган.

Қурилманинг ёниб кетиш сабаби расман маълум қилинмади, текширув олиб борилмоқда.