FlyDubai авиакомпанияси FZ981 Дубай — Ростов-Дон рейсини амалга оширган ва Ростовдаги аэропортга қулаган Boeing 737-800 авиаҳалокати қурбонларининг яқинларига ҳамдардлик билдиради. Бу ҳақда компания ижрочи директори Гейт ал-Гейт маълум қилди, дея хабар беради «Ведомости».
«FlyDubai авиакомпаниясининг барча ходимлари номидан Ростов-Дондаги фожиа муносабати билан чуқур изтиробда эканлигимизни билдирмоқчиман. Биз ҳалокат оқибатида ҳаётдан кўз юмганларнинг оилалари билан якдилмиз», — дея таъкидлаган Гейт ал-Гейт.
Унинг айтишича, ҳозирда авиакомпаниянинг асосий эътибори фалокат тафсилотларини аниқлаш, тегишли идораларга бу борада кўмак бериш ва ҳалокат билан боғлиқ маълумотларни тўплашга қаратилган.
«Самолёт бортида 55 йўловчи, жумладан, 33 нафар аёл, 18 нафар эркак ва 4 нафар бола, шунингдек, экипажнинг 7 аъзоси — 5 нафар эркак ва 2 нафар аёл бўлган. Қурбонлар орасида Россиянинг 44, Украинанинг 8, Ҳиндистоннинг 2 ва Ўзбекистоннинг 1 нафар фуқароси қайд этилган», — дея изоҳ берган Гейт ал-Гейт.
Эслатиб ўтамиз, 19 март, шанба куни FlyDubai авиакомпаниясига тегишли Boeing 737-800 лайнери Россиянинг Ростов-Дон шаҳри аэропортига қўниш вақтида ҳалокатга учради. Ҳодиса оқибатида самолёт бортида бўлган барча йўловчилар ва экипаж аъзолари ҳалок бўлган. Самолёт бортидаги йўловчилардан бири ўзбекистонлик бўлган.
Изоҳ (0)