Тошкентдаги Инҳа университети талабалари Кореядаги ёзги мактабда ўқиб келади
Жанубий Кореянинг Инҳа университети 2016 йилнинг 25 июлидан 12 августига қадар бутун дунёдан келган талабалар учун ёзги мактаб ташкил қилади. Ушбу тадбирда Тошкент шаҳридаги Инҳа университети талабалари ҳам иштирок этади, дея хабар бермоқда университет матбуот хизмати.
Ёзги мактабда иштирокчилар «Корея бизнес тизими ва иқтисодиёти», «Бизнесда инглиз тили», «Шарқий Осиё сиёсати ва халқаро алоқалар», «Замонавий келажак технологиялари» ва бошқа мавзулардаги қўшимча ўқув курсларида иштирок этиши мумкин.
Шу билан бирга, талабалар Корея маданияти билан танишиш ва мамлакатнинг сайёҳлик жойларини кўриш имконига эга бўлади.
Жанубий Кореянинг Инҳа университети 2016 йил Тошкент шаҳридаги Инҳа университетининг энг фаол ва иқтидорли ўн нафар талабасига ушбу мактабда бепул иштирок этиш учун имконият яратиб бермоқда. Ёзги мактабда ўз хоҳиши билан қатнашмоқчи бўлган Тошкент шаҳридаги Инҳа университетининг бошқа талабаларига эса 20 фоизлик чегирма белгиланди.
Тошкент шаҳридаги Инҳа университети ўн нафар энг фаол ва иқтидорли талабаларини ажратиб олиш учун танловлар эълон қилди. Унинг ғолиблари Инҳа ёзги мактабига йўлланмаларни қўлга киритади. ўнта танловдан бештаси ахборот-коммуникация технологияларидаги тизимларни яратиш билан боғлиқ бўлса, қолган бештаси талабаларнинг инсоний фазилатларини яхшилаш ва маънавий-маърифий мавзуларга бағишланди:
I. АКТ соҳасидаги танловлар (тўлиқ ахборот инглиз тилида берилган):
- «Энг яхши портфолио танлови»;
- «Ресурсларни самарали бошқариш бўйича тизим яратиш учун танлов»;
- «Дарсларни режалаштириш бўйича маҳсулот ишлаб чиқариш танлови»;
- «Давомат назорати тизимини яратиш бўйича танлов»;
- «Telegram’да IUT ботини яратиш бўйича танлов».
II. Маънавий-маърифий йўналишдаги танловлар:
- «Маънавият ва маърифат мавзусидаги энг яхши мақола учун танлов»;
- Республикада ўтказилаётган www.e-yoshlar.uz танловида ғолиб чиққан IUT талабасини рағбатлантириш мақсадида қўшимча совға;
- Ўзбекистонга боғлиқ объектив ва ижобий маълумотларни Wikipedia энциклопедиясида ўзбек тилида кўпайтириш бўйича;
- Ўзбекистонга боғлиқ объектив ва ижобий маълумотларни Wikipedia энциклопедиясида инглиз тилида кўпайтириш бўйича;
- Ўзбекистонга боғлиқ объектив ва ижобий маълумотларни Wikipedia энциклопедиясида рус тилида кўпайтириш бўйича.
Университет ушбу танловлар талабаларни янада кўпроқ ўз устиларида ишлашга ҳамда юксак марраларга эришишга жалб қилади деган умидда.
