Ўзбекистон халқ артисти, актёр ва режиссёр Мирза Азизов Муқимий номидаги Ўзбек давлат мусиқали театри раҳбари этиб тайинлангани тасдиқланди. Бу ҳақда «Qalampir.uz»хабар берди.

Foto: “Kino-Teatr.ru”

Фото: «Kino-Teatr.ru»

Бир неча кун муқаддам тарқалган ушбу хабар расман тасдиғини топмай келаётган эди. Аммо, айтилишича, 10 март куни Маданият ва спорт ишлари вазирлиги томонидан Ўзбекистон Миллий матбуот марказида «Ким эдигу ким бўлдик, эртага қандай юксак марраларни эгаллашимиз керак?» номли тарғибот тадбирлари юзасидан ўтказилган матбуот анжуманига Ўзбекистон халқ артисти Мирза Азизов ҳам ташриф буюрган. Анжуманга раислик қилаётган Ёшлар маданият ва санъат маркази раҳбари Жамолиддин Узоқов Мирза Азизовга сўз берар экан, уни Ўзбек давлат мусиқали театрининг директори деб таништирган.

Мирза Азизов 1963 йил 22 майда Наманган вилоятининг Чуст туманида таваллуд топган. 1987 йилда ҳозирги Ўзбекистон давлат санъат ва маданият институтини тугатган актёр 1992–1997 йилларда Ўзбекистон халқ артисти Баҳодир Йўлдошевга шогирд бўлган. 1999 йили Ўзбекистонда хизмат кўрсатган артист, 2015 йилда Ўзбекистон халқ артисти унвонларини олган.